తను ‘వెచ్చ’నంటా..

“పూలనే… కునుకేయమంటా…
తను ‘వచ్చె’నంటా.. తను వచ్చె’వెంటా’
తను ‘వెచ్చ’నంటా..
తను’విచ్చె’నంటా.. ‘తనువిచ్చె’నంటా.. “

        ఇలా కలలో ఒక అబలని ఎడా పెడా ఇబ్బందిపెట్టే పనిలో బిజీగా బిజీగా ఉండగా నిజంగానే రాంబాబుకి లుంగీలో తనువంతా వెచ్చగా స్పృశించసాగింది. లేచి చూసుకుంటే.. కంగారు పడవలసినంత విషయమేమీ కాదు. డైపర్ మానేయడం అలవాటు చేసుకుంటున్న వాళ్ళ చంటోడు ఎప్పుడొచ్చి పడుకున్నాడో తన బొజ్జమీద.. వెధవకి ఉదయాన్నే కాలకృత్యాలు తీర్చుకునే అలవాటు.. వాడికి తెల్లవారింది అంతే.

        తడిచింది లంగా కాదు లుంగీ, వెళ్లి వాడికి మార్చి మీరూ మార్చుకురండి ‘లుంగీ’ - అంది చాలా క్లియర్ వాయిస్ లో A.కాంతం. చలికాలం అందునా చలిదేశంలో బావ బావమరిది సినిమాలో సిల్కు వాయిస్లా ఉండాల్సిన కాంతం వాయిస్ భారతనారి సినిమాలో విజయశాంతికి డబ్బింగ్ చెప్పిన సరిత వాయిస్లా ఉండేప్పటికి, చర్చలకిది సరైన సమయం కాదని గ్రహించి తక్షణమే కార్యోన్ముఖు'డై'య్యాడు.