Tuesday, January 31, 2017

నస - మానస



మనలో మనమాట:
  • నస, (అను)మానస  ఇద్దురు ఇరుగుపొరుగు ఫ్లాట్స్ లో ఉండే ఇద్దురు పెళ్ళైన ఇల్లాళ్లు. (ఎవరింటికి వాళ్ళు మీరు కంగారుపడకండి)
  • ఇరుగుపొరుగు అవడం వల్ల వాళ్ళిద్దరిమధ్య అతి సహజంగా ఉండవలిసిన అసూయ, ద్వేషం, అనుమానంతోబాటు Bonus గా కొంచెం స్నేహంకూడా ఉంది.
  • ఆవిడ ఈవిడ్ని ‘ఒదిన’ అంటుంది, తిరిగి ఈవిడ ఆవిడ్ని ‘ఒదినా’ అనే అంటుంది. ఇద్దరికీ ఒకరి వయసుమీద ఒకరికి ఒక అభిప్రాయమే కానీ కనీసం అంచనా కూడా లేకపోవడమే దీనికి కారణం.
  • మార్నింగ్ రష్-అవర్ అయిపోయాక వాళ్లిదరు ఎవరో ఒకరింటిలో చేరి లోకకల్యాణం గురించి సుదీర్ఘ చర్చల్లో మునిగిపోవటం దినచర్య, ఆనవాయితీ.
  • ఆలా చేసిన సంభాషణల్లో ఒకటి మచ్చుకి..


నస: ఏవిఁటీ..? నీ గోడమీద ‘feeling sleepy’ అని రాసుకున్నావ్? అన్నయ్యగారు కూడా ఈ రోజు ఆఫీసుకి కాస్త లేటయినట్టున్నారు.. రాత్రి థియేటర్ లో సెకండ్ షోనా? లేక ఇంట్లోనే లేట్ నైట్ షోనా?


మానస: you mean Facebook wall మీదా? ఊరుకో ఒదినా.. నువ్వు మరీనూ.
అన్నట్టు మీవారు ఈ మధ్య లంచ్ బాక్సు వదిలిపెట్టకుండా తినేస్తున్నారట. ఆఫీసులో కూడా మా ఆవిడ వంట అద్భుతం అమోఘం అని పొగిడేస్తున్నారట. ఏంటి విశేషం నీ వంటలో అకస్మాతుగా? ఆ చిట్కా ఏదో మాకూ చెప్పి పుణ్యం కట్టుకోవచ్చుగా?


నస: విశేషమేంటంటే.. నేను చేసిన ప్రతి కూర పక్కింటి మానస పంపించింది అని చెప్పి వడ్డిస్తున్నా. అంతే కొంచం కూడా వదలట్లేదు. ఎలాగైనా మగవాళ్ళకి పక్కింటి పుల్లకూరలు రుచి కదా. ఆ చిట్కా వాడా. పనిచేస్తుంది ప్రస్తుతానికి.


మానస: ఈ టెక్నీకేదో బావుంది నేనూ ట్రై చేస్తా.


నస: అవును మీ అత్తగారికి ఉగాదికి 50 వేలు పెట్టి చీర కొన్నావట ఏంటీ విషయం? ఇంతకీ ఇచ్చావా లేదా?


మానస: ఇంకా ఇవ్వలా. మంచి సందర్భం కోసం wait చేస్తున్నా. విషయమేంటంటే మొన్న సంక్రాంతికి వచ్చినప్పుడు మా అత్తగారికి గుండెల్లో నొప్పొస్తే డాక్టరు ‘ఏదైనా షాకింగ్ న్యూస్ ఆవిడ చెవిన పడకండా చూసుకోండి, పడితే ఆవిడ ప్రాణానికే ప్రమాదం’ అన్నాడు. ఆవిడ గుండెలో నొప్పి నిజమో? డాక్టరు వైద్యం నిజమో? ఈ దెబ్బతో తేలిపోవడమో లేదా ఆవిడ పోవడమో జరగాలి.


నస: మొత్తానికి చాలా costly ప్రయోగమే


నస: మొన్నీమధ్య మా అత్తగారికి కూడా గుండెనొప్పొచ్చి డాక్టరుకి ఫోన్ చేస్తే 2 వేలు అడ్వాన్సు తీసుకుని తరువాతి నెలకి appointment ఇచ్చాడు.


మానస: అదేంటండీ.. ఈలోపు ఆవిడకేదైనా ఐతే?


నస: నేను అంత తేలిగ్గా వదిలేస్తానా? అడ్వాన్సు తిరిగిచ్చేస్తానన్నాడులే.


మానస: అన్నట్టు ఈ విషయం తెలుసా.. 302 లో సావిత్రి గారిది సహజమరణం కాదట.. వాళ్లాయనే చంపేశాట్ట.


నస: ఆయన మాత్రం ఏం చేస్తాడు.. అస్తమానం ‘నిండు పసుపు కుంకుమలతో పండు ముత్తైదువుగా పోవాలని’ దేవుడ్ని అదేపనిగా ప్రార్ధించేదట. పతియే ప్రత్యక్ష దైవంకదా.. చూసి చూసి ఆ దేవుడు చేయవలసిన పని ఈ దేవుడే కానించేసేసుంటాడు.


మానస: అవునూ.. మీ ఇంట్లో ఎవరికెక్కువ పవరుంది? నీకా, మీ అత్తగారికా?


నస: మా అత్తగారికే. ఇది నేను చెబుతున్న విషయం కాదు. మొన్న కళ్ల డాక్టరు దగ్గరికెళ్ళినప్పుడు వాడు కూడా అదే చెప్పాడు.


మానస: గత వారం రోజులనుంచి ఆ ఎదురింటి బ్యాచిలర్ నిన్నే చూస్తున్నాడు. గమనించావా?


నస: లేదే.. అయినా నీకెలా తెలుసు వాడు నన్నే చూస్తున్నాడని?


మానస: పక్కింటి Y. శా Lee చూసి చెప్పిందిలే. ఎందుకంటే 6 నెలలుగా వాడ్నే చూస్తుందిట. అదే ‘గమనిస్తుందిట’.


నస: పోయిన నెలలో రవ్వల గాజులు కొన్నావట.. ఈ నెలలో డైమండ్ నెక్లెస్ కోన్నావట. ఎంతయిందేమివిటి?


మానస: రవ్వల గాజుల సెట్ ఒక లక్ష. డైమండ్ నెక్లెసేమో 5 లక్షలు. ఏ నువ్వుకూడా మీవారినడిగి కొనిపించుకుంటావా?


నస: అదేం లేదు. ఇలాంటి దుబారా ఖర్చులేవీ లేకుండా ఎంత ఆదా చేశానో మావారికి చెబుతామని.


మానస: ఒక నెల రోజులనుంచి బాగా బద్ధకంగా ఉంటోందండీ.


నస: ఈ సమస్యకి నాకు తెలిసి ఒక స్పెషలిస్టు డాక్టరున్నాడు.


మానస: కొంచెం ఇంటికొచ్చి చూస్తాడేమో కనుక్కోరూ.. చాలా ఇబ్బందిగా ఉంది.


నస: మీవాడెందుకూ అస్తమానం క్రికెట్ అని తిరుగుతుంటాడు. ఫుట్ బాల్ లాంటి వేరే ఆటలేమైనా ఆడొచ్చూగదా.


మానస: వాడు చిన్నప్పుడు వాళ్ళ నాయనమ్మ దగ్గర పెరిగాడు. ఆవిడేమో వాడికి ఏవస్తువునైనా కాలితో తన్నకూడదని చెప్పిందట.


నస: మొన్న మా అత్తగారు భలే ఝలక్ ఇచ్చింది తెలుసా?


మానస: ఏం జరిగిందేవిఁటీ?


నస: ‘నా తదనంతరం నా కాసులపేరు నీకేనమ్మాయ్’ అంది. కదాఅని ఉదయాన్నే జీడిపప్పు ఉప్మా దగ్గర్నుంచి రాత్రికి చికెన్ బిర్యాని వరకు అన్నీ వండిపెట్టా. రాత్రికి మావారొచ్చాక ‘కోడలు పిల్లకి కాసులపేరు ఇస్తానని మాటిచ్చా’ నాకు ఇప్పుడు ఒకటి కొంటావా? ఛస్తావా? అని కూర్చుంది. ఇప్పుడు నాకివ్వకపోయినా పరవాలేదత్తయ్యా అన్నా వినిపించుకోవట్లా.


మానస: మొన్నామధ్య డిన్నర్ కి బయటకెళ్లాం హోటల్ పేరు వెరైటీగా ‘Cuisine కొత్తల్లుడు


నస: ఏవిటట అక్కడ వెరైటీ?


మానస: అక్కడి ఫుడ్ మెనూ.. వంటల రుచులు డైలీ కొత్తల్లుడికి చేసినట్టు శుచిగా రుచిగా ఉంటాయని సింబాలిక్ గా అలా పెట్టారట.


నస: మరి అలానే ఉన్నాయా?

మానస: నాకైతే ‘Cuisine ఇల్లరికపల్లుడు’ అని పెడితే సరిపోయేది అనిపించింది. ఫుడ్డు బాలేదు, సర్వీసు అంతకన్నా బాలేదు.


Sunday, August 07, 2016

వెండి తీగలు



మూడేళ్ళ క్రితం తలలో కనిపించావ్.. మా ఇంటి యజమానిని పెట్టించి నీ పీక తెగ కోయించా. మూడు నెలల క్రితం గడ్డంలో కనిపించావ్.. మంటలేస్తున్నా రోజుమార్చి రోజు షేవింగ్ చేస్తూ నీ ఉనికి లేకుండా చేస్తున్నా. మూడు వారాల క్రితం మీసంలో.. మూడు రోజుల క్రితం నాసికా కుహురంలో. కానీ..కానీ.. మూడు నిమిషాల క్రితం కను బొమలు.. చివరికి రెప్పలలో కూడా నిన్ను చూశాక ఇప్పుడర్థమయింది 'ఇందు గలదందు లేదని సందేహము వలదు శిరస్సంతా ఎందెందు వెదకిన అందందే కలదు'. సర్వాంతర్యామీ.. ఈ లైను నీకు పూర్తిగా నప్పుతుంది.

Sunday, July 31, 2016

గురవయ్య మాష్టారు




ఒరేయ్ దరహాస్ ఆ ఏడుపు ఆపరా క్లాసులో అసయ్యంగా.
అమ్మా షర్మిళా మమ్మల్ని సిగ్గుపెట్టకుండా కాస్త తిన్నగా కూర్చోటం అలవాటు చేసుకోతల్లి. పై తరగుతుల్లోకెళితే ఇలాటివి ఎవరూ చెప్పలేరు, చెప్పరు.
నాయనా కుచేలకృష్ణ బ్రేక్ లో తిందువు ఆ అటుకులు లోపల పెట్టు.
అమ్మా సుభాషిణీ.. ఆడపిల్లలు అలా బూతులు మాట్లాడితే ఆట్టే బాగోదమ్మా. తగ్గించు.
బాబూ జ్ఞానేశ్వర్.. ఒకటో ఎక్కం చదవటమేవిటిరా? నీ బండ బడ.
అమ్మా సునయన.. కళ్ళకి కాటుక మాత్రం దట్టంగా పట్టిస్తావ్, కాని కళ్ళద్దాలు మర్చిపోయొస్తే ఎలామ్మా?
శ్రీమంత్ బాబూ.. ఆర్నెల్లవుతుంది స్కూలు ఫీజు కట్టక, మీ నాన్న కుబేర్రావ్ గారికి కాస్త గుర్తుచెయ్.
అమ్మా వృక్షశ్రీ.. అబ్బా ఆ పేరు పిలవాలన్నా రాయాలన్నా చాలా ఇబ్బందిగా ఉంది తల్లీ. మీ నాన్నగారు 'సుందర్ లాల్ బహుగుణ అభిమాని' అవటం మా చావుకొచ్చింది.
కోమలీ.. నువ్వలా క్లాసులో మగపిల్లల్ని కూడా కొడుతుంటే నాక్కూడా కాస్త భయంగానే ఉంటుంది ఈ మధ్య.
ప్రియ దర్శినీ.. తలకు ఏ బ్రాండు ఆముదం వాడతావో చెబితే మా చంటోడికి అజీర్తి.. వద్దులే ఈ సారికి అల్లోపతిని నమ్ముకుంటా.
స్వప్నా.. అలా క్లాసులో పడుకోకూడదమ్మా.. లే.. ఏదీ.. చెయ్యి వెనక్కి తిప్పు.
రేయ్ సుశీల్.. ఆడపిల్లలతో ఆ వెకిలి చేష్టలేంటిరా..? ఏదీ.. వెనక్కి తిరుగు.

Wednesday, July 13, 2016

ప్రసవ వేదన



హాస్పిటల్ లో ఓ స్త్రీమూర్తి ప్రపంచ జనాభా++ చేయడానికి ప్రసవ వేదన అనుభవిస్తుంది. ప్రసవ రోదన ప్రదాత ఆవిడ భర్త మూర్తేమో హాస్పిటల్ బయట టీ బండి దగ్గర వేళ్ళ మధ్యలోంచి ఊపిరితిత్తుల్లోకి పొగతోబాటు అమ్మాయా? అబ్బాయా? అనే కన్ఫ్యూజన్ని పీలుస్తూ..  రింగు, రింగులోరింగు,  ఆ రింగులో ఇంకో రింగు వదులుతున్నాడు ఆటవిడుపుగా. తన కలలో వచ్చిన అందమైన ఊహకు పదరూపం ఇవ్వడానికి ప్రసవ వేదన అనుభవిస్తున్నాడు ఆ పక్కనే పార్కులో ఒక మారుమూల బెంచి మీద ఓ కవితామూర్తి.కానీ పాపం ఈ మూర్తిగారికి నొప్పులు మొదలై నెలక్రితంమే నెలైంది. అదే పార్కులో నాలుగు బెంచీలవతల ఈరోజైనా ఎలాకోలా తను ప్రేమిస్తున్న విషయం తెలుగులోనే, ఇంగ్లీషులోనో, హిందీలోనో చెప్పాలని ప్రసవ వేదన అనుభవిస్తున్నాడు ఒక ప్రేమమూర్తి. ప్రియురాలు మాత్రం ప్రేమతో.. “మూర్తీ.. ఐస్క్రీమ్ మీద ఇవాళ్టి కెరామెల్ టాపింగ్ కన్నా నిన్నటి చాకొలేట్ టాపింగే బావుంది” అని బ్రేవుమంది. ఈ మూర్తి గాడి వేదన/రోదన మొదలై ఎన్నాళ్ళయిందో మీ ఊహకే వదిలేస్తే..  పార్కుకి ఆనుకుని ఉన్న కాలేజీలో ఇన్విజిలేటర్ ఇప్పుడే వడ్డించిన వేడి వేడి క్వశ్చన్ పేపర్లోంచి తెలియని ప్రశ్నలకి జవాబులు రాయడానికి ఆ విద్యామూర్తి పడేది ప్రసవ వేదన కాకపోతే ఇంకేంటి?

Saturday, May 14, 2016

మౌనంతో ముచ్చట్లు




ఈతరాని ఒక మనిషి, చుట్టూ కాపాడేనాథుడు లేని పరిస్థితుల్లో.. నడిసంద్రంలో పడవలోంచి జారి నీళ్ళలో పడ్డాడు. మెదట కొన్ని క్షణాలు ప్రాణంకోసం పాకులాడినా.. తరువాత కాపాడేవారు లేరని తెలిసి ప్రాణం మీద అశపోయి (అనేకన్నా వదిలేసి) వేలమీటర్ల లోతున్న సముద్రంలోకి ఆలోచనకొక్క అంగుళం చొప్పున మునిగిపోతూ తన జ్ఞాపకాల పొరల్లోంచి మనసుకి ఇంచి ఇంచి దూరంగా ఒక్కొకర్ని గుర్తు చేసుకుంటూ గడిపే ఆ చివరి క్షణాలు (అనేకన్నా యుగాలు) ఎంతో భారంగా ఉంటాయి. అది పరిపూర్ణ ఏకాంతం. నిస్వార్ధభరితం. శ్వేతవర్ణభరిత మౌనం. క్షణాల్లో జీవితమంతా తన కళ్ళ ముందు కదులుతుంది. ప్రేమలు, బంధాలు, బాధ్యతలు, భవిష్యత్తు... అవును ప్రేమించిన వారి భవిష్యత్తు, అది భార్య పిల్లలు కావచ్చు, తల్లిదండ్రులు కావచ్చు, ప్రేమించిన వ్యక్తి కావచ్చు. ఇష్టపడ్డ పని లేదా లక్ష్యం కావచ్చు. 
నిత్య జీవితంలో కూడా ప్రతి మనిషి (ఏ కాంత చెంత లేని) ఏకాంతంలో అంత కాకపోయినా ఎంతో కొంత మౌనం ఆవహించిన క్షణాల్లో దేని గురించి ఆలోచిస్తాడు. ఒంటరిగా ఒక సుదూర ప్రయాణంలో, సంధ్యాసమయంలో సాగరతీరంలో, వేసవిలో ఓ వెన్నెల రాత్రిలో, కళ్ళు తెరచి తీక్షణంగా ఆ శూన్యంలో ఏం చూస్తాడు. ఆ నిశ్శబ్ద సంగీతం ఏ రాగం. నిష్కల్మషమైన ఆ తెల్లని మౌనంతో ఎలాంటి ముచ్చట్లు చెపుతాడు. తన రహస్యాల పెట్టెలోంచి ఒక్కొక్క వస్తువు బయటికి తీస్తాడు. ఆ వస్తువులు పోగొట్టుకున్న మనుషులు, వాళ్ళ ప్రేమలు, తెగిపోయిన బంధాలు తరువాత తెలిసిన వాటి విలువలు, చేజారిన అవకాశాలు, దరిచేరిన విజయాలు, వెంటపడే ఓటమి భయాలు ఇలా ఏవైనా కావచ్చు. ఒక్కొక్క వస్తువు వంక మనసారా చూసుకుని, జ్ఞాపకాలు నెమరువేసుకుని ముద్దు ముచ్చట్లాడి మళ్ళా పదిలపరుచుకుంటాడు. ఒక్కోసారి ఆ మౌనంలో కూడా ఆలోచనకీ ఆలోచనకీ మధ్య మౌనం ఆవహించవచ్చు. ఆ సంభాషణలో తన ఆత్మ సాక్షాత్కారం కావచ్చు. ఆత్మావలోకనంలో తన తప్పులు తను తెలుసుకోనూవచ్చు. తన సమస్యకి పరిష్కారం దొరకవచ్చు. 
అలా మనలో మనల్ని మనముందు ప్రతిష్టించుకుని మనసులో దాచుకున్న ప్రశ్నలడిగి, దాచుకోలేని జవాబులు చెప్పి చేసే ఆత్మ సంభాషణ, ఆ మౌనంతో మనసు చెప్పే ముచ్చట్లు ఎంతో అందంగా ఉంటాయి.